انت تسأل ونحن نجيب

السلام عليكم

زوجى وأنا مهندسين ديكور أو بمسمى أكثر دقة (مصممين داخليين) دة الاسم الرسمى لمهنتنا.

المهم إننا قررنا نعمل المدونة دى عشان نحاول نفيد أكبر عدد من الناس
وأى حد عنده سؤال يخص الأخشاب خاصة أو التصميمات الداخلية أو كل ما يتعلق بالديكورعامة يبعت لنا السؤال وإحنا هنحاول نرد عليه.

طيب إحنا ايه اللى خلانا نفكر فى إننا نقول للناس معلومات عن الأخشاب؟؟

هما سببين.

أول سبب :

إننا كنا مرة ماشين فى الشارع ولقينا معرض أثاث عارض مطبخين من خشب الموسكى واحد لونه فاتح والتانى لونه غامق

ولما سألنا البائع عن سعر كل واحد فيهم قال إن الغامق أغلى بحوالى 2000 جنيه (السعر دة كان من كذا سنة )

- ليه ياسيدى ؟؟

- يا بيه عشان الفاتح دة خشب موسكى والغامق دة خشب زان.

طبعا زوجى وأنا كتمنا ضحكنا لان البائع لو كان يعرف إننا بنفهم فى أنواع الخشب ما كنش غشنا وطالما إحنا إتعرضنا لهذا النوع من الغش إذن أكيد ناس كتير إتعرضوا له وهم يا عينى ما يعرفوش الفرق بين أنواع الخشب.. دة كان السبب الاول اللى هو الغش التجارى

السبب التانى:
لظروف مهنتنا فطبعا بنتعامل مع ناس كتير مهتمة بالاخشاب والديكور وخاصة العرايس والعرسان
وأغلبهم هم وأهلهم مش فاهمين أى حاجة كل اللى فاهمينه إن مافيش أحلى من خشب دمياط
ولازم البنت تشترى فرشها كله من دمياط من المحل الفلانى دة اشهر واحد هناك عشان بنت خالتها إشترت منه وبنت عمها إشترت منه
وطبعا هى مش أقل منهم دة غير إنها لازم تشترى الفرش كله فخم وضخم بصرف النظر عن مساحة المكان اللى هانحط فيه الاثاث دة .
طبعا كل دة كلام فارغ
اولا أثاث دمياط مش هو أحلى عفش لإن فيه كتير من الغش اللى ما حدش يتخليه زيه زى المناصرة فى القاهرة

لكن ممكن يكون أثاث دمياط أحلى أثاث فى حالتين:

أول حالة إنك تكون بتفهم فى الخشب وصعب تتغش فيه .

تانى حالة إنك تكون بتتعامل مع مكان ليه إسمه وسمعته مش ورشة صغيرة أو محل مغمور

فى بعض الاحيان أثاث دمياط بيكون مش هو احلى أثاث لان فيه كتير من الغش اللى ما حدش يتخليه

يعنى مثلا تروح تشترى غرفة البائع يقولك:

- لو جدع شيل ضلفة الدولاب دة خشب ماسيف يا بيه ( ماسيف يعنى خشب طببيعى )

وطبعا ماتقدرش تشيلها فتقول:

- يا سلام ادى الخشب ولا بلاش

ولما تتتفتح الضلفة دى من جوة هل ممكن تتخيل انها محشية رمل او صبة ؟؟ ( الصبة دى عبارة عن جبس بمية او نشارة بالغرا مع ورق وزبالة)

وطبعا المصيبة دى ممكن تعمل حشرات وفعلا حصل الموقف دة لواحدة صديقة لينا أصرت إنها تشترى حجرة نومها من هناك من غير حتى ما تستشير اى حد بيفهم وطبعا لما الحجرة ركبت وابتدت صديقتى تستعملها وبعد تلات سنوات بالظبط من جوازها وإستخدامها للغرفة بدأت الزبالة اللى جوا الخشب تعمل حشرات والحشرات إبتدت تاكل الخشب وتخرج بره وأصيبت صديقتى بالفزع وكلمتنى قالت لى إلحقينى رحت أنا وزوجى وأخدنا الحجرة للورشة وأول ما فتحنا الضلف فوجئنا بما يخرج منها من حشرات بسبب الصبة المكونة من قصاقيص الخشب والنشارة والورق .. وطبعا صديقتى من كتر قرفها من اللى شافته رمت الغرفة كلها واشترت غرفة تانية من شركة تصنيع أثاث معروفة وموثوق فيها (مفكو حلوان )

نوع تانى من انواع غش الخشب فى دمياط :

تروح تشترى صالون زان .. يقولك البائع دة زان يابيه ميه ميه لما تتفرج عليها تلاقى ظهر الكنبة مثلا كذا لون وكذا قطعة خشب متوصلين ببعض عن طريق الغرا تقوله طيب ليه الكنبة مش كلها لون واحد ( دة طبعا لما تشوف الطقم قبل الدهان ) يقولك البائع : يا بيه دة خشب طيبعى دة زان بتاع ربنا مش ممكن يبقى كله لون واحد دة جاى من الشجرة على هنا على طول وكل قطعة حسب لون الشجرة اللى جت منها

وطبعا الكلام دة مش صح .. ليه؟؟

لان المفروض ان ظهر الكنبة مثلا عشان يكون صح بيتفصل من قطعه خشب واحدة

والطريقة دى طبعا هاتتسبب فى كمية كبيرة من هادر الخشب ودة طبعا ما يعجبش التجار وبالتالى بيعملوه من قصاقيص الزان وبيغروها مع بعض لحد ما يتكون عندهم مايسمى بالطبلية ويبداوا يقصوا منها ظهر الكنبة فبالتالى بيكون ظهر الكنبة كذا لون لأنه مش من قطعة خشب واحدة ومع الاستخدام الغرا بيفك ويبتدى ظهر الكنبة فى التشقق ويضعف وينهار مع الاستخدام

ولما الطريقة دى إتكشفت لبعض الناس فأصبح التجار حاليا بعد ما يعملوا الكنبة من قصاقيص الخشب اللى كل قطعة فيه لونها يختلف عن اللى جنبها .. يقوم صانع الكنبة بعد ما يصنعها يحرقها كلها اوكسجين ( يعنى يتم دهان الخشب بماء الاكسجين فيفتح لونه جدا ) عشان تبقى كلها لون واحد وبالتالى لما تشوفها تلاقى لون الزان فيها فاتح جدا يكاد يكون أبيض أو أوف وايت فلما انت تشوفها كدة تقوله :

- ليه لون الخشب فاتح اوى كدة مش دة زان ولازم يكون فيه احمرار فى لونه؟؟ يقوم البائع يقولك:

- يا بيه دة زان نمرة واحد ودرجة اولى.. دة انضف نوع عشان كدة فاتح الغامق بيكون درجة تانية وتالته واحنا هنا بنستعمل الغالى بتاع التصدير ( مع ان مصر بتستورد الزان ) وبالتالى مافيش حاجة اسمها خشب تصدير لاننا مش بنزرع الخشب الزان فى مصر من اصله.

نقطة كمان

فى بعض الاحيان التاجر يقولك يا بيه دة كرسى زان معتبر ما تقدرش تشيله من مكانه وفعلا لما تحاول تشيل كرسى سفرة مثلا بتلاقيه تقيل جدا

دة مش معناه ان الخشب كويس

لان مهما كان الزان تقيل يبيقى مش التقل اللى يهلك ست البيت وهى بتشيل كرسى من مكان لمكان

طيب الكرسى دة تقيل ليه ؟؟

لان الخشب اللى مصنوع منه بيكون رطوبته عاليه او بمعنى اخر الخشب شارب ميه كتير ودة بيحصل فى نقل الاخشاب من بلادها لحد ما توصل هنا او سوء تخزين يعرض الخشب للامطار او المياه

وطبعا بعد فترة من شراءك لكرسى بالثقل دة هايبدى مع الوقت الخشب يبخر الميه اللى فيه وبالتالى هتلاقى ارجل الكرسى بتبتدى تلف او تتعوج

ويبتدى يحصل تنميل فى زوايا الكرسى نتيجة انكماش الخشب بعد ما بخر المية اللى فيه وفى بعض الاحيان اجزاء الكرسى بتنفصل عن بعض مع كتر الاستخدام وبينهار تماما الكرسى بعد كام سنة يمكن خمس سنين

ويإما نبتدى نصلح الكرسى او نشترى غيره

فى حين ان الكرسى الصح المفروض يعيش معاك على الاقل عشرين سنة

لو متصنع صح

طيب انت كمستخدم تعرف تأكد ازاى من المعلومة دى

انك تطلب من صانع الكرسى جهاز قياس رطوبة الخشب وغالبا بيكون موجود عند اكتر التجار اللى بيشتروا الخشب بكمية كبيرة

ولو قراية الجهاز اعلى من 12 يبقى المفروض ما تشتريش الخشب دة

والافضل انك تشترى أثاث بيتك من شركة كبيرة زى مثلا هابيتات habitat

ليه لان الشركة دى عندها ادارة مراقبة الجودة بتشرف على جودة المنتج بداية من شراء الاخشاب وحتى نهاية مراحل التصنيع

ومن الشركات المحترمة فى المجال دة مفكو حلوان وايجى هاوس اللى هى احدى شركات احمد بهجت وفى شركات تانية بس الصراحة انا ناسية اساميهم حاليا

دى بعض المعلومات البسيطة عن طرق الغش فى الصناعه والتدوينة الجاية ان شاء الله هاتكون عن انواع الخشب وصور لأشكالهم

وبالتالى اللى عنده اى سؤال يحب يسأله احنا هنحاول نجاوب على قد معرفتنا ولو مانعرفش هانسأل ولو ما وصلناش لاجابة هانقول ما نعرفش عشان احنا اكتر حاجة بضايقنا لما نسأل واحد سؤال ويكون مش عارف الاجابة يقوم يفتى بالغلط ويغرق الى قدامه

نرحب بإستفساراتكم وربنا يقدرنا ونجاوب عليها ويارب تكون المدونة دى فى ميزان حسناتنا.